ஆதிச்சநல்லூர் - அகழ்வாராய்ச்சி நிலையம் அமையும் இடத்தின் அருகில் பயங்கர தீ விபத்து.

தூத்துக்குடி மாவட்டம், ஸ்ரீவைகுண்டம் அருகில் ஆதிச்சநல்லூர், பகுதியில் கடந்த மூன்று மாதங்களாக கருங்குளத்தில் இருந்து ஸ்ரீவைகுண்டம் செல்லும் வழியில் அடிக்கடி தீ விபத்து ஏற்பட்டது, இந்த சம்பவத்தில் கருகிய நிலையில் உள்ள வாழை மரத்தில் தீடீரென்று தீப்பற்றி எரிவதும், அதை தீயணைப்பு படையினர் அணைப்பதும் வாடிக்கையாக இருந்து வந்தது.

இந்நிலையில் வருகிற 5 ந்தேதி ஆதிச்சநல்லூரில் உலக தரம் வாய்ந்த அருங்காட்சியகம் அமைக்க மத்திய நிதி அமைச்சர் நிர்மலா சீதாராமன் வர உள்ளார். அதற்காக ஆயத்த பணிகள் தீவிரமாக நடந்து வருகிறது. மிகப்பெரிய விழா மேடை அமைக்கும் பணிக்காக ஏற்பாடுகள் தீவிரமாக நடைபெறுகிறது. 

இதற்கிடையில் இன்று 01.08.2023 மாலை 6 மணி அளவில் ஆதிச்சநல்லூர் பகுதியில் கருகிய நிலையில் உள்ள வாழையில் லேசாக தீ பிடித்துள்ளது. இந்த தீ காற்றின் வேகத்தினால் மற்ற இடங்களில் பரவ ஆரம்பித்தது. பின்பு அருகில் இருந்த பனை மரத்தில் தீ பற்றியது. ஆடி மாத காற்று சூழன்று அடித்த காரணத்தினால் தீ இன்னும் வேகமாக பரவியது. இதனால் சுமார் 300க்கு மேற்பட்ட பனை மற்றும் தென்னை மரங்கள் பற்றி எரிய ஆரம்பித்தது. 

அதோடு மட்டுமல்லாமல் நீரின்றி கருகிய நிலையில் இருந்த வாழை தோட்டத்திலும் மள மளவென தீ பரவ ஆரம்பித்தது. அக்கம் பக்கத்தில் உள்ளவர்கள் திருவைகுண்டம் தீயணைப்பு துறைக்கு தகவல் கொடுத்தனர். திருவைகுண்டத்தில் இருந்து தீ அணைக்கும் படையினர் சம்பவ இடத்துக்கு வந்து தீயை அணைக்க போராடினார்கள். காட்டு தீ அங்கிருந்து பரவி ஆதிச்சநல்லூரில் மேடை அமைக்கும் பகுதி வரை பரவியது. அந்த இடத்துக்கு தீ பரவாமல் இருக்க தீயணைப்பு படையினர் போராடினர்.

இதற்கிடையில் திருச்செந்தூரில் இருந்தும், பாளையங்கோட்டையில் இருந்தும் கூடுதலாக தீயணைப்பு படை வீரர்கள் வந்து மூன்று வாகனத்தில் தீயை அணைக்க முயற்சி செய்தனர். ஆனால் தீ அருகில் உள்ள தனியாருக்கு சொந்தமான உணவு விடுதி, அங்கிருந்த மூன்று இரு சக்கர வாகனம் மற்றும் புல்டோசர் இயந்திரங்களை எரித்தது. அங்கு திரண்டு வந்த அப்பகுதி மக்களும், திருவைகுண்டம் ,செய்துங்கநல்லூர் காவல் துறையினரும் தீயை அணைக்க கடும் முயற்சி செய்தனர்.

அந்த வழியாக வந்த சாலை போக்குவரத்து நிறுத்தப்பட்டு l, கருங்குளத்தில் இருந்து பேருந்து கொங்கராயகுறிச்சி திருவைகுண்டம் வழியாக செல்ல மாற்று ஏற்பாடு செய்யப்பட்டது. நெருப்பு சுவாலை திருச்செந்தூர் ரோட்டை ஆக்கிரமித்தது. மேலும் மின்சாரம் தடை ஏற்பட்டதால் அந்த பகுதி முழுவதும் இருண்டு விட்டது. தொடர்ந்து 3 மணி நேரமாக தீயணைக்கும் படையினர் போராடினர். காற்று குறையாமல் சுழற்றி அடிப்பதால் தீயை அணைப்பது பெரிய சவாலாக இருந்தது. எரிந்த வாகனத்தில் தொல்லியல் துறை ஊழியர் ஒருவரின் வாகனமும் அடங்கும் என்பது குறிப்பிட தக்கது.

தகவல் அறிந்து சம்பவ இடத்துக்கு விரைந்து மாவட்ட காவல் துறை கண்காணிப்பாளர் பாலாஜி சரவணன், திருவைகுண்டம் துணை கண்காணிப்பாளர் மாயவன், திருவைகுண்டம் இன்ஸ்பெக்டர் அன்னராஜ் உள்பட காவல் துறையினர் வந்து, மக்களுக்கு பாதுகாப்பு கொடுத்தனர்.

நான்கு தீயணைப்பு படை வாகனங்களும் முயற்சி செய்தும் தீயை அணைக்க முடியாத காரணத்தினால் காவல் துறையினர், திருச்செந்தூர் சாலை அமைக்கும் ஒப்பந்தகாரர்களின் லாரிகளில் தண்ணீரை கொண்டு வந்து, சாலை அமைக்கும் ஊழியர்கள் மூலமாக தீயை அணைத்தனர். விழா மேடை அருகில் தீ பரவவிடாமல் காத்து கொண்டனர். தற்போது தீயானது தாமிரபரணி ஆற்று படுகையில் உள்ள மரங்களில் பரவி எரிந்து கொண்டிருக்கிறது. அதையும் போராடி அணைக்க அனைத்து நடவடிக்கை எடுக்கப்பட்டு வருகிறது.

மத்திய நிதி அமைச்சர் நிர்மலா சீதாராமன் வருகை தர இன்னும் மூன்று நான்கு தினங்கள் உள்ள நிலையில் தீ விபத்து ஏற்பட்டு இருப்பது அனைவரையும் பேரதர்ச்சியில் ஆழ்த்தியுள்ளது.